ཨ་རིའི་སྲིད་འཛིན་ཊམ་མཆོག་ནས་སྤྱི་ཟླ་བརྒྱད་པའི་ཚེས་བདུན་ཉིན་ལ། ཨ་མི་རི་ཀའི་རྒྱལ་ཁབ་བདེ་འཇགས་སྲུང་སྐྱོབ་ལ་དམིགས་ནས་རྒྱ་ནག་གི་ཊྲིཀ་ཊྲོཀ་དང་སྐད་འཕྲིན་བཀོལ་ཆས་དེ་གཉིས་ཉིན་གྲངས་༤༥ཡི་རྗེས་ནས་དངོས་སུ་བཀག་སྡོམ་བྱེད་རྒྱུའི་ཡིག་ཆ་ལ་མཚན་རྟགས་བསྐྱོན་འདུག དེ་ཡང་མི་མང་པོ་ཞིག་གིས་ད་ཐེངས་ཨ་རིས་སྐད་འཕྲིན་ལ་བཀག་སྡོམ་བྱེད་པ་དེ་ནི་ཉེ་སྔོན་ཊྲིཀ་ཊྲོཀ་བཀག་སྡོམ་བྱས་པ་ལས་ཀྱང་ཤུགས་རྐྱེན་རྒྱ་ཆེ་བ་ཡོད་པ་མཐོང་གི་འདུག ཐེངས་འདིའི་ཀུན་གླེང་ལས་རིམ་གྱི་ནང་དུ་ཨ་མི་རི་ཀའི་ཕྱོགས་ནས་རྒྱ་ནག་གི་ཀྲུང་ཤིང་དང་ཧྭ་ཝེ། ཊྲིཀ་ཊྲོཀ་དང་སྐད་འཕྲིན་སོགས་བརྡ་འཕྲིན་གྱི་ཁྱབ་ཁོངས་སུ་བཀག་སྡོམ་བྱེད་པ་དེ་ལ་དོན་སྙིང་གང་ཡོད་པ་དང་། སྐད་འཕྲིན་བཀག་སྡོམ་བྱ་རྒྱུའི་སྐོར་ལ་སྲིད་དོན་ཉམས་ཞིབ་པ་ཚོས་གླེང་སློང་ག་འདྲ་གནང་གི་ཡོད་པ་སོགས་ཀྱི་སྐོར་ལ་འདི་ག་ཨ་རིའི་རླུང་འཕྲིན་ཁང་གི་བོད་སྐད་སྡེ་ཚན་གྱི་རྩོམ་སྒྲིག་འགན་འཛིན་ཚེ་བརྟན་དབང་ཕྱུག་ལགས་ལ་བཀའ་འདྲི་ཁག་ཅིག་ཞུས་ཡོད།